Duanaire i láimh an údair: Filíocht Eoghain Ruaidh Mhic An Bhaird i Leabhar Inghine Í Dhomhnaill

Abstract

Dírítear aird san alt seo ar shraith dánta leis an bhfile Eoghan Ruadh Mac an Bhaird atá scríofa i dteannta a chéile i mír amháin de Leabhar Inghine Í Dhomhnaill (KBR 6131–33, fol. 22–27), agus áitítear gur autograf i láimh údair na ndánta atá sa scríbhinn. Bunaítear an argóint ar chomparáid phailéagrafaíochta idir peannaireacht na ndánta agus dhá sholaoid eile de láimh Mhic an Bhaird a aithníodh cheana féin, ceann díobh sa lámhscríbhinn chéanna (ar fol. 28) (Breatnach 2001), agus an ceann eile i measc chnuasach na mBráthar Mionúr sa Choláiste Ollscoile, Baile Átha Cliath (UCD-OFM A 14, fol. ix) (Breatnach 2008). Neartaíonn an ardcháilíocht théacsúil a bhaineann le cóipeanna na ndánta sa scríbhinn le fianaise na peannaireachta.